ARREDOL | Se cumple iste 2013 catorce edicions d’o Festival Periferias de Uesca que chirará ista anyada arredol d’o chenero d’a terror. Amás, se i ferá homenache a o recientment falleciu escritor uescano Javier Tomeo, fascinau por tot o monstroso y por a horror vital.
Iste festival, que trescruza as mugas entre os diferents cheners artisticos, contará con un ixambre d’ufiertas culturals de toda mena (mosica, literatura, cine, teatro, danza, fotografía, artes plasticas, etc.) que tendrán como punto común a horror en as suyas diferents versions, no nomás o chenero d’a terror, sino tamién “a horror d’a guerra, Goya, Auschwitz, os Khmers Royos y todas as expresions d’a terror psicolochica, l’angunia y l’espanto debant d’a realidat”, seguntes comentan dende o festival.
O festival se realizará entre os diyas 30 d’octubre y 3 de noviembre y se celebrará a Nueit d’as almetas, fendo-se o diya 1 de noviembre l’homenache a Javier Tomeo. O cartel d’o festival ha estau feito por o uescano Lorenzo Caudevilla Laliena, basando-se en o poema “O Cuervo” d’Edgar Allan Poe, chunto a peliculas como “O Resplandor” u peliculas d’Alfred Hitchcock.
