ARREDOL | O comité “rechional” de UGT (Unión Cheneral de Treballadors) en Aragón aprebó iste lunes os suyos presupuestos ta l’anyada 2013, a on que se replega a posibilidat de fer un ERE (Expedient de Regulación d’Emplego) que podría afectar a dica 45 treballadors d’iste sindicato que’n conta con 101 en tot lo territorio aragonés. D’os 45 treballadors, bi’n habría 29 tecnicos y 10 administrativos.
S’ubre agora un tiempo de 30 diyas de negociacions y consultas ta viyer como s’articula o ERE. A primer reunión se ferá o chueves 24. No ye a primer vegada que UGT fa servir un ERE ta prebar d’escoscar as suyas cuentas. Ya en marzo de 2012, forachitoron a 20 treballadors y bi habió un ERE temporal ta toda a plantilla mientres 56 diyas.
O sindicato quier con istas midas cabidar 1.000.000 d’euros en iste exercicio. O suyo presupuesto ta ista anyada ye de 5,6 millons d’euros, un 20% menos que en 2012. A perda de ingresos, seguntes fuents d’UGT, ye debida más que más, a la perda de convenios con as administracions publicas.
