Arredol | Artieda ya para as actividatz que antis d’o 19 de setiembre servirán ta refusar o recreiximiento de l’entibo de Yesa y as nuevas expropiacions que quiere fer a Confederacion Hidrografica de l’Ebro. Ixe 19 de setiembre a CHE quiere fer sinyar as expropiacions a vecins, que denuncian que en iste caso, ya son terrenos completos que amás, afectan a o recreiximiento a cota maxima, que no ye prevista de fer. En a suya intinción de espardir a convocatoria y a situgación por a que esnabesa la localidat, mesmo un choven d’o lugar ha quiesto deixar platera a oposición a Yesa a la vegada que a solidaridat con o pueblo palestino en o muro que tranca os territorios palestins d’Israel.
Ta concarar a prebatina d’a CHE, os vecins d’Artieda y l’Asociación Río Aragón son parando buena ripa d’actividatz, que ya han prencipiau a espardir a traviés d’os retes socials dende una colla de Facebook que han ubierto ta informar d’a campanya y d’o refús a las expropiacions, Aturando Yesa. Dende l’Asociación Río Aragón denuncian “a corrupción y os obchectivos especulativos y de cara ta un trescole que se amagan dezaga d’ista obra, asinas como a violación que suposa ta o meyo ambient” y convidan a qui quiera a acampar en Yesa dende o lunes 17 de setiembre ta “fer parti d’a luita d’Artieda contra iste prochecto y asistir a las esferents actividatz que se n’han parau”.
Chunto a l’acampada, que rematará o diya 19, s’han parau vesitas a lugars despoblaus d’a redolada como Tiermas u Ruesta (que ye en parti recuperau), chentas populars, charradas y documentals. O diya 19, a partir d’as 19, s’ha convocau una chornada de resistencia contra las expropiacions, como ya facioron o zaguer mes d’abril.
