[/caption]
O diya 29 de marzo prencipió muit luego ta muitas de nusatras, ta belunas, as que’n recorrioron os piquetes de maitinada, sisquiera bi habió un diya que escomencipiar. A Vada Cheneral ye ta os y as revolucionarias un diya de guerra ubierta, un diya en o que l’orden estableixiu se creba y s’imposa a lei de luita d’a clase treballadera. Ixe diya cualsiquier comercio ubierto, cualsiquier esquirol, cualsiquier policía u reaccionario se convierte en un enemigo ubierto. Ye nomás que una chicorrona baralla d’ista luita de clases en a que irremediablement vivimos inmersos, l’autoesfensa lechitima d’as obreras y obreros contra la enrestida radical d’o poder capitalista.
Como organización, Purna acudió t’as 7:00 d’a maitinada chunto a o sindicato d’estudiants Universidat a o piquete que bi heba organizau en o Campus de San Francisco en Zaragoza. Allí de conchunta con atras fuerzas revolucionarias d’a ciudat y con a cucha independentista zarremos os accesos a o campus y o transcurso d’as primeras horas d’o diya nos dispersamos por o mesmo trancando diferents facultatz. No dudamos en chilar a os esquirols, mayestros u alumnalla, que blincaban as cletas d’o recinto t’acudir a o puesto en o que o sistema quier. Y especialment sinyalable estió lo piquete en a Facultat de Dreito an se congrega a mayor parti d’estudiants reaccionarios y do a choventut independentista estiemos fendo fuerza t’impedir que os esquirols dentraran.
A las 11:00 nos concentramos en as puertas d’o campus y baixemos con pancarta y bloque propio enta o centro d’a ciudat trencando o tramvía y trancando os comercios que nos trobabanos ubiertos. Tampoco no ista vegada dudamos en risponder a la provocativa actitut que bells propietarios amostraban lo que cheneró momentos de tensión con as fuerzas d’ocupación espanyolas. As nuestras cantas de clase en aragonés se sentiban con fuerza en o transcurso d’a manifestación dende a Gran Vía dica o Paraninfo an se leyeron varios manifiestos.
Tamién de maitins en Teruel, dende as 7:30, Purna estió partipando en os piquetes organizaus chunto a o Bloque Crítico. A las 11:30 estiemos en a manifestación d’estudiants convocada por l’Asambleya d’Estudiants do s’han dixau veyer as nuestras estreladas y que recorrió a ciudat dica o centro historico d’a mesma, estio una manifestación especialment combativa que remató con una posada debant d’una siede d’a CAI que i heba desahuciau lo diya d’antis a una familia.
En Zaragoza, estiemos chunto con o grueso de participants d’a manifestación d’a universidat que acudió a un piquete espontáneo en o Corte Inglés y que dimpués d’unos poquetz menutos consiguió estar zarrau. De nuevas as fuerzas represivas espanyolas fación uso d’a violencia y cargón contra os manifestants agredindo, entre muitas atras, a varias militants d’a cucha independentista. Tras un ratet de tensión con os mercenarios d’o sistema nos marchemos enta o piquete convocau en l’edificio de El Trovador mientres en o camin ibanos trancando diferents comercios.
En Uesca Purna estió en a manifestación convocada por os sindicatos alternativos an arredol de dos mil presonas salioron a la carrera zarrando o Coso dica la Plaza Navarra. En ista manifestación, que se fació a las 12:00 d’o maitín, militants de Purna repartioron panfletos clamando contra la reforma laboral y a independencia d’Aragón y levando tamién as suyas estreladas.
Ya de tardes, a ixo d’as 19:00, formamos de nuevo un bloque en a manifestación d’os sindicatos alternativos con o SOA y a cucha independentista. A choventut independentista participamos activament en as cantas y reivindicacions d’a marcha y estiemos muit presents en as intervencions d’a Plaza d’o Pilar an dimos un especial refirme a la intervención, en aragonés, d’o representant d’o Sindicato Obrero Aragonés debant de más de quince mil presonas que plenaban a plaza.
A las 19:30 estiemos militants de Purna en Uesca con pancarta compartida d’Universidat en a manifestación contra a reforma laboral que bi heban convocau os sindicatos d’o sistema pero a la que tamién s’heban sumau os alternativos, muitos atros colectivos y a ciudadania en cheneral y que congregó arredol de cinco mil presonas.
Tamién de tardes en Teruel, a las 19:30, participabanos en o Bloque Crítico que congregó arredol de mil presonas que no quereban secundar a convocatoria oficialista de os sindicatos oficials. A chornada de luita remató fendo una crida a l’autoorganización d’a clase obrera y a la necesidat de convocar una nueva vada Cheneral.
A valoración que fa Purna d’ista chornada de luita y de reivindicacions obreras ye muit positiva, s’ha dau un blinco qualitativo y quantitativo en a combatividat d’a clase treballadera aragonesa y as revolucionarias no podemos desaprofeitarlo. Denunciando a la cucha d’o sistema, a la socialdemocracia oportunista y a os sectors más reaccionarios, a choventut revolucionaria debe apostar y saber fer veyer a la clase treballadera o suyo prochecto por un Aragón independiente y socialista. En ixa faina nos trobamos y no imos a reblar dica aconseguirlo.
¡Entalto Aragón libre y socialista!
Purna, A Chovenalla Independentista y Revolucionaria
