[/caption]
L’aire ha tornau ta la zona de Castanesa ista nueit y as previsions endican que no s’aturará, encara que sí que afloixará. En tot caso, o gubierno diz que a lo menos l’incendio ye “estabilizau” y luén d’os lugars habitaus a os que han puesto tornar bells vecins, pero encara no totz. Por l’inte, han puesto tornar ta casa suya os vecins de Senyiú y Neril. Seguntes os datos d’o Gubierno, l’incendio ha cremau entre 1.100 y 1.200 hectarias, encara que atras fuents calculan arredol d’as 1.600.
Tamién s’ha puesto reubrir a carretera N-260. Entre que afloixa l’aire, os helicopteros antiincendios preban de controlar o fuego, que encara que ha rebilcau en bellas zonas, no s’ha estendillau ista nueit.
En l’operativo d’iste domingo triballan atra vegada más de 300 presonas. I hai tres hidroaviones d’o Ministerio, tres collas helitransportadas d’o Gubierno (Alcorisa, Penyalba y Exeya), un helicoptero bombardero Kamov, una brigada d’intervención rapida de Ruente (Cantabria), una brigada d’intervención rapida con siede en Daroca, una coya proveyida con helicoptero procedent de Castellón, dos helicopteros d’a UME (un d’extinción y un segundo de coordinación), seis collas terrestres (Ayerbe, Semontano, Calatayú, Planizar, Os Mallos y Alto Matarranya) y cinco autobombas d’o Gubierno.
Encara son difuera d’os suyos lugars vecins de Castanesa, Benifons, Ardanui, Noales, Erberá, Llagunas, Ribera, Ardanué, Fonchanina, Denui, Carots y Xiscarri, perteneixients a os municipios de Montanui y de Las Pauls.
Fuent: Arredol
