O 1 d’aviento de 2015 Puyalón se chuntaba en a oficina d’a DGPL, en a seu de l’avenida Ranillas, con o director cheneral Nacho López Susín y representants de cultura y luengas de CHA. A lechislatura no heba que prencipiau y l’obchectivo d’a reunión yera transmitir un sentimiento d’unidat y emparo a o nuevo director de politica lingüistica, asinas como presentar a CHA un “Pacto nacional por la lengua Aragonesa”, que en o futuro tamién podría estar sinyau por atros partius politicos.
As impresions, dimpués de bells debates, estioron positivas y CHA se comprometió a sinyar sin garra problema iste Pacto. Desafortunadament, 1 anyo y 8 meses dimpués, Puyalón encara no ha recibiu iste pacto sinyau por CHA.
As zagueras noticias arredol d’a publicación en o BOA o 28 chunyo de 2017, a Resolución de 16 de mayo ’17 con l’aprebación d’a “Grafía de consenso” y a respuesta de rechazo por parti de d’os d’as asociacions, EFA y SLA, que heban prencipiau o proceso. Deixa a CHA en muit mala posición, nomás con o refirme d'a suya asociación lingüistica de referencia, Consello d’a Fabla Aragonesa, y a escenificación d’una politica cultural y lingüistica que no convence a dengún. O consenso no puede arribar a traviés d’a imposición d’unos postulaus lingüisticos que dimpués de 30 anyos (norma grafica d’o ’87), son rechazaus por una gran parti d’a comunidat aragonesoparlant. Nacho López Susín (CHA) nomás ha mirau d’estar flexible en uno d’os puntos d’a suya grafía propuesta, y ha prebau de que a resta d’o mundo lingüistico aragonés cambiase o 100% d’os suyos puntos.
No ye a unica d’as decisions controvertidas de Nacho López Susín, en lo que leva de lechislatura, pero sí que ye la más polemica y la más asperada. Con un proceso que ha levau bells meses, con una decisión presa entre tres lingüistas de prestichio, pero que en o comunicau d’o martes 4 de Chulio, EFA y SLA s’encargaban de denunciar o suyo “oscurantismo” y a suya falta de rigor. Ista decisión no ha feito que dividir encara més a l’asociacionismo que treballa por l’aragonés, y a perda d’a confianza en o Director General de Politica Lingüistica.
Puyalón continará treballando en pro de consensos y a unidat d’os aragoneses/as, asinas lo ha contrimostrau en istos anyos. Creyemos que a recuperación Curricular en Primaria y Secundaria en EOI, más clases, a fundación d’a DGPL, a OLA en Uesca u atros estamentos, son noticias positivas. CHA y qualsiquier atro partiu nos va a trobar en totz os foros de treballo común, creyando a Oficina de l’Aragonés en Zaragoza, denunciando as enrestidas a la luenga… pero no imos a reblar en denunciar as politicas erronias, en iste caso d’un partiu como CHA que se define como aragonesista.
