Altavoz

Selfies, followers i transformacion social

| 28 febrero, 2018 07.02

Guy Debord diva que a la sociedat de l’espectaclo ya no importa el ser sino simpllement el pareixer. L’espectaclo pa ell eva la relacion entre personas mediatizada per imagens, é dir, la realidat deixa de ser vivida directament i pasa a ser una mera representacion. La realidat surte en l’espectaclo i aón tot é apariéncia. En l’actualidat, a una sociedat dominada per selfies, postureyo i likes a Instagram, la imagen se situa al centro de moltas de las relacions socials qu’establlim i a la forma en que modelam el nuestro mon, lo que mos porta a preguntar-mos qué transmitim con els contenius que cream i compartim a pllataformas como Facebook, Instagram u Twitter.

Seria una error parllar de la vida a Internet como una vida digital paralela a la realidat d’un indivíduo. Pel contrário, las accions cutianas se trasladan al ret, tornant-se en un mecanismo més d’interaccion. Internet pasa a ser un espácio on las personas hi viven la suya vida cutiana i explloran la construccion del status social, d’amistaz u de relacions amorosas. Ixe “Yo” que se forma a la sociedat mediatizada actual é de vez llector i escritor de conteniu simbolico (imagens, textos, etc.), con els qu’elaborar la suya própia subjetividat. Estas pllataformas ufririan la oportunidat pa crear espácios on crear identidaz socials i politicas.

Uno dels nuevos elementos qu’amaneixen con la extension dels rez socials é el concepto de “influencers”, personas que con enorme inflluéncia deviu als suyos seguidors i que amostran el suyo dia a dia de vez que promocionan productos i servícios. Dende una envista feminista, bella investigacion ha criticau que se mostre a la muller a través d’un ideyal asociau, per un costau, a la autenticidat, exito, llibertat d’eleccion i empoderamento i, per altro, a l’enfasis a la suya agencia sexual i l’uso que fan del suyo cuerpo. Desenrrollan la suya marca personal amostrant un modelo de muller independient, con deseyo sexual, que mira seducir i ser seducida pero que, a la fin, remite a una vision masculina hegemonica de la belleça i la sexualidat. Per contra, tamben s’ha demostrau que pllataformas como Youtube u Instagram han serviu pa la difusion i l’aceptacion de la diversidat sexual con decllaracions ubiertas d’homosexualidat d’influencers i de demés personas famosas. Els rez socials poden ser ferramenta de reivindicacion (i transformacion) social como, per eixempllo, el Body Positive Movement, que fa servir Instagram pa amostrar altros cuerpos no normativos i combatir els estereotipos de belleça dominant.

Per tanto, el funcionamento dels rez socials i els contenius que s’hi crean se materializan a la vida offline, d’astí que se faiga tan important la construccion de discursos alternativos a estas esferas. Una tarea que se confronta a una gran indústria al redor de la imagen i l’espectaclo que responde a una llogica mercantil qu’acaba tornant moltas de las iniciativas en productos i eslogans sin conteniu transformador.

28 febrero, 2018

Autor/Autora


Flickr
Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR