Radio Topo 101.8 FM: 20 anyadas más y millor

Queremos prencipiar agradeixendo a las companyeras d’AraInfo que haigan contau con nusatras ta iste especial de #MediosLibres y asumimos o reto de, a lo menos, fer un poder por debuixar con parolas una realidat complexa por lo que fa a dinamica, participativa y ubierta como ye Radio Topo 101.8 FM. Yera un 7 d’octubre de 1993 quan os nuestros microfonos s’enchegoron y emitieron por primer vegada t’a ciudat de Zaragoza. 21 anyadas mas tarde y dende l’alegalidat d’una Radio Libre, continamos creyendo en a importancia d’a comunicación. No queremos charrar –una vegada más- d’a censura, sobreinformación u sesgo d’os mass …

DIGITAL CAMERAQueremos prencipiar agradeixendo a las companyeras d’AraInfo que haigan contau con nusatras ta iste especial de #MediosLibres y asumimos o reto de, a lo menos, fer un poder por debuixar con parolas una realidat complexa por lo que fa a dinamica, participativa y ubierta como ye Radio Topo 101.8 FM.

Yera un 7 d’octubre de 1993 quan os nuestros microfonos s’enchegoron y emitieron por primer vegada t’a ciudat de Zaragoza. 21 anyadas mas tarde y dende l’alegalidat d’una Radio Libre, continamos creyendo en a importancia d’a comunicación. No queremos charrar –una vegada más- d’a censura, sobreinformación u sesgo d’os mass media, queremos que as personas y os movimientos socials paren cuenta d’a importancia de tener un medio como Radio Topo 101.8 FM do expresar as suyas inquetutz culturals, socials u informativas. Pensamos que no se puede estar libre sin medios ta estar-ne, os #MediosLibres somos as ferramientas ta crebar o monopolio informativo.

Quan nos preguntatz por casos concretos en que haigamos treballau ta blincar o bloqueo informativo, y sinyalando debant de tot que no somos un medio profesional (ni queremos estar-ne), destacamos como fitas mas recients as zaguers vagas chenerals. Entendemos a comunicación como qualcosa bidireccional y, en conseqüencia, ofrimos una ferramienta que qualsiquiera puede fer servir. As personas d’a radio estiemos treballando dende l’estudeo y as unidatz mobils dende l’amaneixer, coordinadas con atros #MediosLibres d’a ciudat, cubrindo y contando tot lo que yera ocurrindo en a carrera: detencions, corridas, manifestacions… y una rufierta de valoración d’a chornada de vaga con os sindicatos alternativos. Pero lo que de verdat imple de sentiu un prochecto informativo como lo nuestro ye que en Mercazaragoza u en o Bicipiquete te sigan escuitando y griten a o 976 29 13 28 ta informar a personas igual que ellas d’o que ye ocurrindo, porque saben que en Radio Topo 101.8 FM tienen voz. Somos un medio, no pas una fin.

Por pasadas tampoco no queremos deixar de remerar atras coberturas como os 11 dias que as okupas se’n puyoron t’o tellau de l’antigo Colechio de Sant Agustín, as antimilitaristas que estioron emitindo dende a torre de Santa María en Exeya, as Cincomarzadas, Baixadas d’a Canal…

Reivindicamos a vichencia d’a freqüencia modulada (FM) como medio horizontal y accesible. Qualsiquiera puede escuitar a radio simplament sintonizando un chicot transistor, TDT u móbil. Entendemos que a FM ye o nuestro medio natural de comunicación y imos a encetar un ambicioso prochecto tecnico que amillore a nuestra cobertura, cubrindo Zaragoza de tot y mesmo indo dillá. Con tot y con ixo, apostamos por as nuevas tecnolochías y emitimos por Internet, mantenemos una web a on que os nuestros programas penchan os suyos podcasts y femos servir una cuenta en Twitter.

Creyemos en a necesidat de teixer retz informativas y solidarias dende lo local enta lo global. A experiencia nos ha contrimostrau a importancia de treballar a zofra con atros #MediosLibres, os abances tecnolochicos facilitan a interacción local y global. Hemos teixiu retz internacionals de solidaridat con atrás RRLL, como as campanyas ta furnir de material a Radio La Primerísima (emisora sandinista de Managua) u o Movimiento Zapatista de Chiapas. A ran local y como Radio Libre somos federada en a Federación Aragonesa de Radios Libres (FARL).

Radio Topo 101.8 FM funciona de traza asambleyaria, as decisions se prenen en una asambleya mensual. No existe una linia editorial, cada programa ye autonomo y responsable d’as suyas opinions. Sí existen uns Estatutos que totz os programas han de conoixer y respectar, y que charran d’as normas basicas que nos hemos auto-imposadas, por eixemplo: no fer servir lenguache masclista, no demandar o voto ta partius politicos, aconfesionalidat y asinas-asinas.

Radio Topo 101.8 FM ye un medio independient y autochestionau. A independencia d’una Radio Libre tien os alazetz en a premisa de no acceptar diners en traza de subvencions ni publicidat. A sola financiación nuestra proviene d’as conductas d’os programas y de l’esquimen d’actividatz como socalces, venda de material u conciertos. En iste sentiu cal sinyalar que fer parte de Radio Topo 101.8 FM no nomas ye fer un programa y pagar a correspondient conducta, ye obligatorio participar en as actividatz d’autofinanciacion d’a radio.

En 2013, con enchaquia d’o nuestro XX cabo d’anyo, encetemos a campanya de soci@s 20+ ta financiar as importants milloras tecnicas con as que asperamos poder continar crebando a incomunicación 20 anyadas más y millor.

Radio Topo, Radio Libre

Radio Topo somos una Radio Libre que emitimos en o 101.8 FM d'a ciudat de Zaragoza. Somos un medio, no pas una fin; ubierto y participativo, autochestionau y asambleyario: la voz de las sin voz.

Radio Topo | Ta el Especial ‘Medios libres. Quiénes son y cómo trabajan’

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies