ARREDOL | Quan pasa si fa u no fa dos semanas de que se fese o zaguer “D’estrela a estrela”, Radio Topo 101.8 FM ha publicau en a suya web as mas de 17 horas de emisión especial en aragonés y catalán d’os pasaus 8 y 9 de noviembre.
“D’estrela a estrela” ye una emisión que reivindica a as luengas propias aragonesas y que a radio libre zaragozana organiza anyalment con a participación d’os suyos programas, y que cuenta tamién con a colaboración d’atras radios libres d’a ciudat, en ista zaguera emisión Radio La Granja y Radio MAI.
A emisión no deixa de creixer, arribando en ista quartena edición a blincar as 17 horas de radio, que emplioron tot un cabo de semana. Como novedatz tamien d’ista emisión, bi habió un socalce participativo con radio en directo y, ya de nueitz, un concierto con as collas 13 Krauss y Ezinean que plenoron a caramuello a sala.
“D’estrela a estrela” ye una iniciativa unica en tot Aragon, que s’organiza sin garra aduya institucional y que china-chana se ye tornando en una d’as fitas anyals d’as luengas aragonesas.