Perineus Sud: Un quarto de sieglo de culturas

Iste viernes 15 de chulio prencipiará un estiu más, y ya van 25 vegadas, Perineus Sud. Iste ye o suyo nombre coloquial pero a denominación completa ye Festival Internacional d'as Culturas Perineus Sud

Festival Pirineos Sur. Foto: Pirineos Sur ©

Ye important amprar ficacio a o titol y sobre totz a la "s" a la fin de "culturas" porque ye astí an reside a filosofía que lo guía y que l'ha inspirau dende a suya naixencia: servir de altavoz a las distintas culturas mosicals que existen en o planeta.

O ficacio a la diversidat ye poco habitual en istos tiempos de anglofilia. Una cosa que no tiene brenca de malo por ella mesma, cadagún triga os suyas filias y a cultura anglosachona ye una d'as mas ricas que existen ¿qué dubda culle? O problema surte quan a suya sobrerrepresentación en os meyos nos puede plegar a eclipsar atras propuestas con apoyos menos potents pero igualment valurosas y atractivas.

1992 estió l'anyo que veyó naixer a o Perineus Sud pero iste tardó un par d'edicions más en aconseguir o suyo formato actual en el qual cada anyo ye dedicau a una tematica. A primera, en o 94, se centró en l'África Negra. Con o tiempo istas demarcacions mas cheograficas dioron paso a atras mas conceptuals como por eixemplo a de 2015 que se preguntaba "Mugas, ¿mezcla u barrera?". A present edición será dedicada a celebrar o quarto de sieglo d'o festival.

Pero antiparte d'a suya tematica, Perineus Sud conta con mas peculiaridatz que lo distinguen d'a mayoría de festivals. a primera ye a temporal. A diferencia d'a mayoría de festivals, Perineus Sud no dura un cabo de semana sino que gosa de extender-se a lo largo de toda a segunda metat de chulio. Ta suportar ista duración as actuacions se dosifican y en cuenta de trobar dos u tres días con decenas d'artistas que mesmo se solapan, en Perineus Sud como muito podemos trobar-nos quatro u cinco mosicos por chornada.

A segunda particularidat ye a cheografica. Luen d'a mayoría de festivals, que se concentran en as grans ciudatz u en a costa, Perineus Sud se celebra en Sallent de Galligo, una chicota localidat d'o Serrablo que no plega a 1.500 habitants. Iste ye un d'os rincones más polius d'o Pirineo. As actuacions son deseparadas por tasos kilometros y se distribuyen entre Sallent y o iconico escenario flotant sobre o pantano de Lanuza que ye marca d'o festival. Amás, a cercania con a muga francesa sirve de metafora sobre a mezcla de culturas que se busca representar.

Pero o gusto por o detalle no remata en a espaciada programación y o trigau entorno. A dedicación d'a organización a los temas trigaus va mas enta allá mesmo d'o mosical. En iste apartau dentrarían multitut d'actividatz que tienen puesto en Sallent y meten o contrapunto diurno a l'achenda. Eixemplos serían os "mercaus d'o mundo", que permiten desfrutar de l'artesanía y birolla d'atras zonas d'o planeta; y atros como tallers, exposicions u actividatz infantils.

Programación mosical 2016

Entre a decena de mosicos que actuarán iste anyo se pueden trobar muitos muit resenyables dende o primer día. A chornada d'obridura, o viernes 15 de chulio, tendrá un marcau gusto flamenco, empecipiando por Duquende y o suyo homenache a Paco de Lucía. Pero o plato fuerte d'o día será en a interpretación de "Shongai", o mitico disco que Ketama gravó chunto a Toumani Diabaté en 1988. A l'atro'l día actuará a orquesta, mas que banda, Gogol Bordello con a suya mezcla de rumba, *sonius balcanicos y punk, si ye que totz dos primers no lo son de por ell.

A semana siguient o acento pasará dende a mosica achitanada dica a subsahariana, un territorio tant gran como diverso. O martes 19 de chulio actuarán os congolenyos Mongwana Star con a suya hipnotica mezcla de ritmos y canticos tribals con electronica. O día venient será o redolín de Songhoy Blues contrimostrando que en Bamako tamién se fa blues. Y o sabado 23 a mosica seguirá estando negra pero con ritmos chamaicanos. O escenario de Lanuza veyerá a mesma nueit a Alpha Blondie, o músico reggae mas famoso d'o continente africano, chunto a Mad Professor, un d'os productors mas influyents d'o dub.

A zaguera semana de festival albergará o martes 26 de chulio a o Niño de Elche, o mosico que leva anyos revolucionando o flamenco pero sobre tot dende que l'anyo pasau lanzó "Voces del Extremo". Y ya quasi ta zarrar, o sabado 30 de chulio actuará Bunbury, que no pasaba por o festival dende que en 2000 prencipió a suya corrida en solitario.

Amás d'os conciertos a guinda de quantas nueitz será mesa por una selecta representación de djs aragoneses como l'eclectico Dj Javimar, l'orichinario de Senegal Dj Douds, o especialista en funk, boogalo y un largo etcetera Dj Pendejo; o dúo impredictible O Gancho Sonidero u o veterano DJ Lord Sassafras.

[alaya_toggle status="open" title=""]+info: pirineos-sur.es[/alaya_toggle]

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies