ARREDOL | Dimpués de l’exito d’a primer edición, l’Asociación cultural “La Charata” d’Orés contina con l’apuesta por o cine d’iste chicot lugar d’as Cinco Villas, organizando iste sabado, 3 de noviembre, a segunda edición d’o concurso de curtometraches de terror y suspense, “Orés, de miedo”. Deciseis cintas, tres amateurs y tretze profesionals, competirán por os premios. A lista de curtometraches y l’orden de prochección se puede trobar en o blog d’o festival.
Antiparte d’a prochección d’os curtos (dende as 18.00 horas) y a elección d’as cintas premiadas, o programa se completa con actividatz pa ninos, como un Taller de Halloween, a on os participants habrán de levar una carbaza y una vela, una rota por o lugar pa fer a plega de carambels. Ya en pasar a meyanueit, empecipiará una Rota de Terror por o lugar con lectura d’un relato, acabando a chornada con un concurso de chilos y un baile d’esfraces.