Ista tradición d'orichen echipcio plegó dica Aragón a traviés de l'Imperio Romano. Tamién aconsiguió pervivir en a posterior sociedat cristianizada que usaba lenya ta calentar-se en as largas nueitz d'o solsticio d'hibierno, que dimpués estioron a nueitbuena.
As proximas calendatas en que o Ligallo de Fablans amostrará ista tradición serán o 26 d'aviento en Samianigo (Diversabi), o 27 d'aviento en Monzón (Chiquicinca) y o 29 d'aviento en Uesca (Palacio de Congresos).
O Ligallo de Fablans fa una representación teatralizada d'o rito pa que o publico asistent tienga a oportunidat de conoixer o suyo orichen, a suya evolución y cómo se puede celebrar en tiempos de fogars con calefacción central. O ritual consiste en amagar uns dulces baixo una tronca. Dimpués ye bendito con vin, se recitan unas parolas y se le truca con uns palos dica que expulse os dulces que serán replegaus por os mas chicotz d'a casa.
Qualques d'as formulas que s'usan en o ritual son "Tronca de Nadal yo te bendizco, En un nombre d'o Pai, d'o Fillo y d'o Esprito Santo! Amén!". Dimpués se debanta u porrón y se le diz "Bebe tizón, bebe porrón, o tuyo por a boca y yo por o garganchón", u bien "O tuyo yes negro, yo soi blanco y en a tripa me te zampo". Se bebe a gargalet y se pilla un tocho y retizando deseyos como istos "Buen tizón, buena casa, buen barón, buena brasa, que Dios conserbe a tos amos d´ista casa" u "Buen tizón, buen baron. Buena casa, buena grasa. Buena longaniza grasa, Y a Duenya d´ista casa".
En Zaragoza, o 23 d'aviento, tamién se podrá veyer una tronca de nadal en a Tabierna a Flama, carrera Mayor 53, vico d'a Madalena, a las 19.00 horas.
Por a suya parte, l'Asociación Cultural Nogara (situada en a Plaza Asso de Zaragoza) tamién fació una representación d'iste ritual o pasau 19 d'aviento en o suyo local frent a os suyos alumnos y alumnas de primer y segundo grau d'aragonés.