Subportada Movimientos

Lugars e cultura: espácios de mullers

La cultura en tanto que produccion humana ye heteropatriarcal, esto ye, ye androcentrica: nomás s'ha a fer una gollada a lo sistema literário, por exemplo, pa veyer que la nomina d'autors conoxius supera a la nomina d'autoras conoxidas
| 17 diciembre, 2017 07.12
Lugars e cultura: espácios de mullers
Ilustración: Rubén Hervás

A pesar que la produccion de la cultura ye en gran part masculina, lo publico que más cultura consume son las mullers. En las ciudaz este feito pasa inadvertiu e s’ha a acudir a estadisticas pa constatar que las mullers consumen más cultura que no los homes. Sin embargo, esta situacion ye pro evident en los lugars.

Antes d’abordar lo tema, s’ha a prener en cuenta que la violéncia estructural que exerce lo heteropatriarcau ha una manifestacion concreta en lo mundo rural, pos astí confluixen más exes de desigualdaz que no en l’ambito urbano. Uno de los exemplos que ilustra esto ye la division d’espácios: lo espácio publico ye reservau pa los homes e lo privau pa las mullers pos ye astí do fan tot lo triballo de cudiaus. Sin embargo, dentro de lo ambito publico, los eventos e actividaz culturals acostumbran a contar con una mayor preséncia de mullers: como organizadoras e como publico; ye decir, en los lugars, la cultura ye un espácio de mullers. Seguntes lo zaguer Diagnostico  de la igualdat de genero en lo medio rural, las mullers destinan muito menos tiempo a l’ócio (42,95%) que no los homes (57,05%) -porque las tareas de cudiaus e mantenimiento de la casa ocupan la mayor part de lo suyo tiempo-, pero son ellas las que adedican más tiempo a la cultura en lo suyo tiempo libre.

Asinas, las actividaz culturals son uno de los espácios publicos en lo ambito rural do las mullers no son vistas como convidadas u como entes que no bi perteneixen, ya que han feito de la cultura un punto d’alcuentro e de socialización dellá de l’ambito privau (entendendo por este zaguero qualquier alcuentro que se faiga en lo tiempo adedicau a lo triballo de cudiaus). En este punto, cal fer atencion a los horários rurals: de manyanas son las mullers las que van ta lo bar e charran por la carrera; e de tardes son los homes los que fan vida fuera de casa. Grácias a los eventos culturals, que gosan estar de tardes, las mullers tamien s’aduenyan d’unos horários que no son própios; ye decir, grácias a lo fomento de la cultura en los lugars, las mullers fan suyo una part de lo espácio publico e unos horários que son socialment atribuius a los homes. Montserrat Roig deciva que la cultura ye la opcion més revolucionária a largo termino e la cultura en lo ambito rural puede estar la ferramienta que faiga que las mullers conquisten e faigan suyo lo espácio publico; pa que la muller rural bi dentre no cal nomás fomentar la conciliación, sino que cal empentar la cultura e la suya participacion en la vida publica e politica de los lugars.

17 diciembre, 2017

Autor/Autora

Muller rural emigrada. @LauraCoGi


Flickr
Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR