Lo exilio rural ye un tema que pareixe que agora ye de moda: una milenta d’articlos arredol d’esta problematica enrunan mutos medios escritos (tanto dichitals como en papel), reportaches en televisión con entrevistas e información de primer mano, etc. Totz tratan de qué ye lo exilio e d’o triste que ye, tamién miran d’ufrir solucions u alternativas pa revitalizar es lugars, pero este no va a estar lo tema d’as altras lineas. Aquí itz a poder leyer sobre temas muit ligaus a lo exilio d’es que no gosan parlar: la ruralidat trending cuentra la ruralidat real e d’o papel d’o chenero en o mundo rural.
¿Qué se quiere decir con a ruralidat trending e qué implicación tiene? Dende fa bel anyo (per no remontar-se ta l’orichen d’o topico literario d’o ‘beatus ille’) lo rural e es lugars s’amostran como un espacio bucolico an se puede descansar, desconectar, fer “agroturismo”, minchar birolla més natural e con més sabor; en definitiva, an la chent de ciudat -que viven a una realidat material a on las relacions interpersonals e con o propio entorno son diferents- s’acercan pa disfrutar d’una experiencia d’ocio alternativa e diferent. Asinas, es lugars se tornan en o destino perfecto pa las vacancias; un destino que tiene més en común con a idealización que se veye en anuncios e cintas de televisión que con a vida rural real. Este perfil de “consumidors d’a ruralidat trending” son personas que no pasan temporadas gueire largas a es lugars, sino que no i van so que pa puents, vacancias u bel cabo de semana, ye decir, son perfils de chent urbana que no conoixen la realidat cutiana d’a vida en estos puestos; sin embargo, esta forma de vivir lo rural tamién se ye extendendo a la chent choven que se’n va d’es suyos lugars e que se’s miran con nostalchia e con uellos bucolicos perque dende la distancia ye més fácil idealizar-los que quan i viven. La vida a es lugars no ye igual como la que se gosa vender en a televisión u como la que se puede disfrutar en as vacancias, quan tot ye a rebutir de chent e pleno de vida; no tiene res a veyer con es anuncios de Central Lechera Asturiana, no son una foto més pa lo Instagram. Es lugars tienen las suyas luces e las suyas uembras escuras, la suya calidat de vida e las suyas carencias; ye una forma de vivir -u de enfrentar-se a la vida- diferent a como se fa en a ciudat, pero no ye una vida idealizada; ye una realidat que, mutas veces, fa mal.
La realidat rural actual ye fruto d’as politicas neoliberals que han feto posible e han promocionau la vida fuera d’es lugars e ye una realidat prou lontana a ixa envista bucolica d’o Trending Topic y d’as RRSS; la carrera vueda quan lo sol se’n va, las casas zarradas en hibierno e es colechios que agonizan per mantener ubiertas las suyas aulas anyo sin altro son imachens muto més acertadas si s’ha de pensar en o mundo rural.
La despoblación e lo exilio rural son las eternas batallas de mutas zonas peninsulars pero d’Aragón en concreto per lo grau d’urchencia que suposa pa lo nuestro territorio ya que lo reparto poblacional aragonés ye asaber que irregular: per un costau, la suya posición en o Estau -alto u baixo equidistant a Madrit e Barcelona- fa que muta población se’n vaiga ta ixas dos grans ciudatz an hi ha més oportunidatz que en o nuestro territorio; per l’altro, si se mira Aragón, la población se concentra per part de Zaragoza mientres que la resta d’o territorio -tanto Teruel como Uesca- ye un desierto poblacional. Es unicos nucleos de población que ufren cierta resistencia a la macrocefalia de Zaragoza son las cabezas de redolada, que son una mena de punto de transición entre lo mundo rural e la ciudat ya que astí se pueden trobar quasi es mesmos servicios que hi ha a la ciudat pero en un ambito més ruralizau que no la capital e, amés, estes son millor vertebraus que es lugars chicotz. Esta ye, alto u baixo, la situación que hue se puede trobar en Aragón e ye lo mapa que las politicas actuals son promovendo: bela cabeza de comarca e un gran metropolis que puyan d’habitants e un medio rural per cada vez més desolador e despoblau. Agora bien, ¿per qué s’emigra d’es lugars, per qué la chent, més que més, la choven no miran de vivir-ie como lo han feto altras cheneracions? S’ha de pensar que la emigración no ye només un movimiento espacial, sino uno social, a saber, ye un doble desplazamiento -local e social- pos la persona emigrada aspira a tener unas oportunidatz (més que més relacionadas con o mundo laboral) e unas condicions de vida cuya realización no veye posible en o lugar (més comunicacions, millor acceso a determinaus servicios como la sanidat u la eduación, per eixemplo); si a esto li sumamos la falta d’interés per mantener vivo lo medio rural ya tenemos la formula d’o exilio sobre la mesa: ye muto més facil oblidar-se d’es lugars que no mirar de trobar ferramientas e solucions pa solventar la suya despoblación e enriquecer de vida un territorio que se ye morindo. Mantener la vida a estes nucleos chicotz suposa uns gastos més elevaus que fer lo propio en as ciudatz, ye decir, ye més caro costear la educación, la sanidat, las comunicacions per carretera u tren u altros servicios en estes puestos perque es va a fer servir menos chent que en nucleos poblacionals més grans. Estes son factors que vulcan la balanza ent’a vida en as ciudatz e que fan que la cantidat d’a emigración contine creixendo e no se crebe. Asinas, hi ha un amplio sector d’a chent choven rural que se veye obligada a salir d’es suyos lugars pa continar formando-se e que no siempre se’n tornan de nuevo e, per tant, una población rural més viella sin un motor de vida u de recheneración como ye la choventut. Estas breus pinceladas que s’han esbozau se pueden fer servir pa confeccionar una imachen més real d’o mundo rural que no las imachens que arriban dende es medios e es retz socials d’una ruralidat trending: un mundo rural de tot desarticulau con a resta d’o territorio, una choventut obligada a emigrar e precariedat en es servicios més básicos baixo la desincusa d’a rentabilidat.
Lo exilio, como s’ha veniu decindo, ye un mal endemico d’Aragón. Sin embargo, quan se gosa parlar-ne, muta chent relaciona u veyen este fenomeno como bela cosa predominantment masculino pero lo cierto ye que lo mundo rural se ye quedando sin mullers. Esto ha d’asociar-se, entre altras cosas, con o cambio en a estructura productiva que ha feto posible que la urbanización enante: d’o sector agrario a lo industrial u servicios. Esta diversificación d’o mundo laboral ha feto que las mullers veigan en a ciudat posibilidatz laborals que no tienen a es lugars; per altro costau, en es lugars las actividatz que més carga de troballo conllevan continan estando l’agraria e la ganadera, sectors en es que la masculinización encara ye mayoritaria, ye decir, actividatz excluyents pa las mullers que continan fendo-se cargo d’a fayena de crianza d’es e las ninas e d’es cudiaus d’as personas grans; amés d’esta cantidat d’oportunidatz laborals, las mullers tamién troban en a ciudat alternativas personals que no pueden desenrollar en es suyos lugars, a on la división d’a vida dentre lo privau e lo publico encara ye prou marcada, a saber, ye una sociedat a on la vida contina separando-se d’acuerdo a l’ambito familiar e laboral.
Ye bien cierto que en o mundo rural las desigualdatz de chénero son muto més acentuadas que no en as ciudatz –an que ya en son prous-. S’ha feto referencia a la escasez d’alternativas laborals pa las mullers, que veyen muit limitau lo suyo acceso a estar población activa; pero este no ye l’único obstáculo pa que ellas puedan troballar fuera de casa suya: es lugars se caracterizan (entre altras cosas) per l’ausencia de guarderías, per uns servicios sanitarios intermitents (no ye raro que en un lugar lo medico no faya visitas so que dos u tres dias a la semana), per contar con uns centrosb d’educación basica, per la escasez de transportes publicos; totz estes factors fan que sía la muller la que s’encargue d’as tareas de transporte (levar a es e las fillas t’o instituto, a es abuelos e abuelas t’o hespital…) e d’es cuidaus en a infancia e en a viellera, ye decir, la falta de servicios favorece que sían ellas las que se queden troballando en l’ambito familiar. La realidat material d’as mullers en o medio rural refleixa asaber-lo bien la chugada que fa lo capitalismo d’a mano d’o masclismo: la fayenada que fan en casa suya e cudiaus no son brenca remuneraus, ye decir, ye un troballo que pa lo sistema actual sale franco: no s’ha de pagar a garra muller per cudiar a es suyos fillos u fillas, ni a lo suyo maríu, ni a es abuelos e tampoco no reciben pensión d’o Estau quan arriban a la suya edat de chubilación.
Tot esto fa que lo cerclo de chenero e exilio se reproduzca per cada vez con més frecuencia e con més cantidat de mullers que se’n van d’es lugars pa no repetir es esquemas de vida tan tradicional. ¿Cómo se puede evitar esta situación? Fa falta tanto un cambio a nivel institucional con politicas que favorezcan la creación d’empleo alternativo pa la muller: que esta pueda optar a més que lo negocio familiar e a lo troballo dentro de casa; como, que las personas que viven en es lugar –e més que més las mullers- prengan conciencia d’esta situación e pidan cambiar-la. Només d’esta forma es lugars serán puestos a on la desigualdat pierda fuerza. Es lugars han d’estar puestos a on se troballe per e pa la igualdat, han d’estar tamién escenarios seguros e enriquecedors (laboral e personalment) pa las mullers, pos ellas tamién han de poder triar a on vivir, si a bela macrociudat u a un lugar chicot d’a sierra de Teruel e han de poder triar con las mesmas garantías e dretos.
Pa zarrar este acercamiento a lo tema d’o exilio rural, cal recalcar belas qüestions: lo exilio ye un problema politico, no pas d’es lugars; politico en tanto que han estau ixas medidas las que han feto que se veiga lo rural como un mundo inferior u como un destino de cabo de semana (es lugars no son atraccións, son puestos an fer vida, an creixer y realizar-se de formas que no son posibles en l’ambito urbano); son estas las que es han descudiau e oblidau. Estas politicas caminan en pro d’un territorio centralizau e con bela capital de comarca que fayan de satelite d’a metrópolis zaragozana e miran d’empobrecen lo territorio deixando morir a es lugars chicotz que tanta vida pueden dar. Pa evitar que es lugars desapareixcan u no conten només que con población estacional, son es e las chovens las que han prener conciencia d’a potencialidat d’es suyos lugars -precisament per estar en es marchens se puede crear e encomenzar ex nihilo - e saber an ye la raíz d’o problema d’o suyo exilio: políticas centralistas que no s’es miran so que quan arriban eleccions pa aconseguir un zarpau de votos. Contar con as mullers e acabar con as suyas desigualdatz (tanto las concretas d’o mundo rural como las que se padeixen a nivel estructural) son dos elementos ineludibles si se quiere ir enta una recheneración e revitalización d’es lugars. Igual como en o caso anterior, ellas tamién han de parar cuenta d’an viene la suya discrimación que fa que haigan de marchar-se d’es lugars: una perpetuación salvache d’o sistema heteropatriarcal. Han de reclamar e, mesmo si cal, arrancar lo suyo dreto a vivir en es lugars que las han visto creixer. La chent choven e las mullers son es dos motors que farán que es lugars d’Aragón no caigan en l’obliu, que no sían un puesto més que navesar con l’auto, que no sían només un destino de descanso pa promocionar la ruralidat trending.
Querer e poder vivir en es lugars siempre ha d’estar una opción.
