ARREDOL | Lo pasau 15 d’aviento se cilebró reunión plenera de lo Estudio de Filolochía Aragonesa (Academia de l’Aragonés), que preside Manuel Castán Espot, y s’aprebó o nombramiento de seis nuevos miembros, en calidat de ‘Correspondients’, que van a incorporar-se d’immediato a las fayenas de codificación lingüistica que en istos momentos se’n son desarrollando.
Os nuevos miembros son Miguel Ánchel Barcos, natural de Fago, en a val d’Ansó y fablant d’o dialecto ansotano; ye lexicografo y traductor.
Juan Pablo Martínez, natural de Zaragoza, ye Doctor en Telecomunicacions y profesor d’a Universidad de Zaragoza. Participa en prochectos de divulgación cultural y lingüistica de gran alcanz y ha desarrollau importants ferramientas de software, d’as que se’n destaca un corrector ortografico y un traductor automatico.
Santiago Paricio, natural de Zaragoza, ye licenciau en Filolochía Hispanica y en Filolochía Catalana; treballa como profesor numerario de secundaria; ha desarrollau importants treballos d’investigación dialectal y sobre l’aplicación de nuevas tecnolochías a la lingüistica. D’a suya labor literaria bi ha que destacar o premio Arnal Cavero que li concedió lo Gubierno d’Aragón en 2009.
Chorchi Díaz, natural de Zaragoza, ye licenciau en Filolochía Hispanica y un important conoixedor d’o dialecto benasqués, amás d’haber investigau en profundidat as parlas ribagorzanas, tanto catalanas como aragonesas; ye profesor numerario de secundaria.
Mª Teresa Moret, natural de Mequinenza, ye doctora en Filolochía Hispanica, conoixedera d’as parlas aragonesas y important investigadera d’as parlas catalanas d’Aragón, asinas como d’as parlas de transición. Ye vinculada profesionalment a la Universidad de Zaragoza y ha treballau en docencia de luenguas en secundaria y en escuelas oficials d’idiomas.
Guillermo Tomás Faci, natural de Zaragoza, ye licenciau en Historia y ye a punto de presentar a suya tesi doctoral que versará sobre a Ribagorza; antiparti d’una impecable trachectoria como investigador, ye gran conoixedor de l’aragonés meyeval y d’as parlas aragonesas modernas.