L’Audiencia Nacional concluye que o PP se lucró d’a trama Gürtel

Confirma a decisión d'o chuez Ruz: o PP se lucró de fondos "procedents d'un delito" presuntament cometiu por os exalcaldes de Pozuelo y Majadahonda.

Foto: Pablo Ibañez (AraInfo)
Foto: Pablo Ibañez (AraInfo)

ARREDOL | L’Audiencia Nacional espanyola ha confirmau que o PP se lucró de fondos procedents d’a trama Gürtel. La Sala d’o Penal de l’Audiencia Nacional ha refusau o recurso presentau por o PP, que solicitó estar parte perchudicada d’a trama, y ha avalau a decisión d’o chuez Pablo Ruz que debe tener condición de “participe a titol lucrativo”.

A Sección Quartena d’ista Sala ha decidiu de refusar o recurso presentau por o PP contra a resolución en que Ruz le ofriba de participar en o caso como “participe a titol lucrativo” d’a trama corrupta en beneficiar d’os fondos procedents d’os posibles delitos cometius por os exalcaldes de Pozuelo, Jesús Sepúlveda, y Majadahonda, Guillermo Ortega.

A investigación apunta que totz dos exdirichents obtenioron 236.864 euros t’o PP, que no puede figurar como acusau porque a lei l’empacha  ta partius y sindicatos. En o caso de l’exmariu d’a ministra de Sanidat, Ruz considera que o PP “habría resultau beneficiau d’a presunta actividat criminal desplegada por Jesús Sepúlveda en 111.864,32 euros“.

“Existen indicios de que o Partiu Popular se benefició d’as quantías que os imputaus dedicoron a realizar actividatz propias de dita formación politica, a quala habió de tener conoixencia d’aquells malfurries, pus repercutió en o suyo propio peculio, de traza que deixó d’abonar aquellas sumas que atros pagoron como gastos d’as campanyas electorals desplegadas en Pozuelo y Majadahonda”, reza l’auto emitiu iste martes.

Ruz aseguró en un auto que a organización se lucró con “fondos indiciariamente procedents d’un delito” y que “debe de responder d’o esquimen obteniu”. Asinas se pronunció en refuse a o recurso presentau por o PP en contra d’a resolución en que se le ofriba a personación en a causa como participe a titol lucrativo d’os delitos investigaus en a primera epoca d’a trama, entre os anyos 1999 y 2005.

L’auto cita cinco informes policials que apuntan a que o partiu de Mariano Rajoy se benefició d’a trama corrupta. Un d’ixes escritos d’a UDEF sinyalaba que a relación d’a Gürtel con o PP yera “simbiotica” en cuenta de “parasitaria”.

Amás, refusa l’argumentación de l’advogau d’o PP, que chustificó que o Tribunal de Cuentas heba fiscalizau totz os suyos exercicios contables y explica que iste organo tien competencias distintas a las d’os procedimientos chudicials. “Pretender que o Tribunal de Cuentas sía qui decida, a os efectos penals, a cantidat malversada, y a suya valuración dende un punto de vista culpabilistico, ye tanto como substrayer d’o Poder Chudicial, en iste caso representau por a churisdicción penal, una función que constitucionalment le viene atribuida”, esfiende a Sala d’o Penal.

[Fuent: Eldiario.es]

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies