ARREDOL | L’alumnalla d’o CRA Cinca-Cinqueta, integrau por as escuelas rurals d’A Espunya, Saraviello, Bielsa, Plan, Sant Chuan de Plan y Chistén, s’ha feito con o Premio Paseo Project Mini 2013, en a suya primer edición, con o prochecto “Cine en aragonés”. O premio, convocau por a Fundación Zaragoza Ciudad del Conocimiento y Ars Electronica, en colaboración con o Concello zaragozano, galardonaba a o millor prochecto creyativo feito a traviés de nuevas tecnolochías y medios dichitals ta menors de 18 anyos.
O churau, integrau por Martin Honzik, director d’o programa U19 Create your World d’Ars Electronica; Lucía Serrano, responsable d’o suplemento Heraldo Escolar; José Manuel Casanova, tecnico d’o servicio d’Educación d’o Concello de Zaragoza; Juan Pradas de Milla Digital y Concello de Zaragoza; Mariano Salvador, coordinador d’o programa Paseo Project; y José Carlos Arnal, director d’a Fundación Zaragoza Ciudad del Conocimiento, ha concediu o trofeu a o prochecto d’o CRA Cinca-Cinqueta por a suya orichinalidat amás d’o buen emplego d’as ferramientas dichitals como “vía de conservación y transmisión d’un determinau herencio cultural, en iste caso a luenga aragonesa“, amás de “vinclar o tradicional con mundo contemporanio a traviés d’a creyatividat tecnolochica”.
O premio ye dotau de 1.500 euros ta material escolar tecnolochico ta escuela, amás d’un viache ta tres personas a o Festival Ars Electronica 2013 en Linz (Austria), a on presentarán iste prochecto en a sección d’o festival U19 Create your World.