Subportada Movimientos #contraelolvido

Ideolochía afusilada: lo faixismo cuentra las turolencas

En 1936 María Pérez Maicas yera miembro d’una familia socialista muit unida. Quan se casó con Ángel Sánchez Batea, destacau ugetista de Teruel, leyeba la prensa, yera diariament informada d’o que ocurriba, treballaba e prou que teneba interés per participar en politica. Tenioron quatre fillos: Pilar, Volney e Jaurés, con nombres de destacaus intelectuals e politicos franceses, e Amor.
| 3 julio, 2017 07.07
Ideolochía afusilada: lo faixismo cuentra las turolencas
Ilustración: Rubén Hervás

Dimpués d’o golpe, Ángel, que se trobaba segando con es suyos companyers, ya no podió tornar ta casa e fuyó to mont a organizar la defensa. La guardia civil realizó un intenso rechistro en o que no troboron armas, només libros, escritos e una bandera que lis tocó en o reparto quan calió disolver, un tiempo antes, la Casa d’o Pueblo.

Sin noticias d’o suyo hombre, con quatre creaturas e lo dido acusador sinyalando-la, María teneba difícil escapatoria. Fuen días angustiosos pero a lo menos una prima d’Ángel descargó a María d’o cudiau e preocupación per es dos ninos levando-se-los con ella. Jaurés e Volney, de quasi ueito e doce anyos respectivament, permanecieron amagaus servindo de cierto alivio que per la suya complexión aparentaban una mica menos edat. Talment si pareixeban ninos de seis e diez anyos no lis tocarían.

María se quedó en o casa familiar dica que con a sencusa de poseyer una radio con a que se comunicaba con Ángel, fue detenida e ya lo 6 d’agosta afusilada. Lo mesmo lis ocurrió a atras vecinas, como María Rubira Soler, choven quinquilaire, Natividad Ángel Remacha, aguacila, u Marta, republicana e socialista que s’heba destacau per la suya gran actividat politica.

En a casa d’a familia Sánchez Pérez no quedaban soque Pilar, de diecisiet anyos, e Amor, de quatre, enchesada e en tratamiento per una lesión en a columna dimpués d’haber caito a redolons per las escaleras. Fue una chirmana d’Ángel qui se la levó pa cudiar-la. Pilar no podeba encargar-se-ne, pero continó repartindo leit bel día més. Pa ixo rodiaba la Plaza del Torico; asinas evitaba faltadas e miradas amenazants d’es falangistas. Heba iu t’a escuela, treballaba e teneba inquituz propias d’una moza d’o suyo tiempo, amés de militar en as JSU. Lo 8 de setiembre dos guardia civils la detenioron chunto a una vecina e amiga, tamién miembro d’as JSU, e las condicioron a poco kilometros de Teruel, ta una venta on acudiban militars. Seguntes pareixe, las facioron enfilar ent’a venta con a sencusa de limpiar unas ollas d’o michar d’es militars: fue alavez quan lis disparoron per dezaga.

Ángel Sánchez Batea luitó dica lo zaguer instante. Logró veyer a sus fillos, evacuaus en una colonia e baixo lo cudiau de su chirmana Antonia. No s’atrevió a levar-se-los ta México con es pasatortes que heba aconseguiu: tenió miedo d’o que podeba esperar-lis. Ella prometió cudiar-los e Ángel arribó a Alicant pero no podió embarcar: fue internau en o campo de concentración d’es Almendros, pa pasar dimpués per la garchola Modelo de Valencia, la de Teruel, u la de Zaragoza. Quedó parlaticau d’a parte inferior d’o cuerpo per las palizas recibidas en es interrogatorios e estadas en a garchola. Finalment, fue afusilau, chunto con atros tres hombres e dos mullers, lo 29 de mayo de 1943.

Antonia terminó presa en Predicadores (Zaragoza) e sus dos fillas, una d’ellas con una creatura de meses, ingresoron en a prisión de Valencia.

3 julio, 2017

Autor/Autora

Colaboradora de AraInfo (@Cristirititi)


Flickr
Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR