zECOLOGIA LISTA Ecología

I tú, esliges el que minjas?

Eslegir es alimentos que posam a la nuestra tablla se torna en una decision fácil i sencilla que fem al supermercau. Saber qu’estam minjant i de qué forma s’está producint, manimenos, se torna una micota més difícil de dovinar.
| 17 junio, 2018 07.06
I tú, esliges el que minjas?
Foto: El Salto

El minjar, como escribe Vandana Shiva, ha deixau de ser una font de nutrients i s’ha tornau en producto, bella cosa con la qu’especular i del qu’obtenir benefício economico. La intensificacion i mercantilizacion de la produccion agricola  i la exportacion ha teniu un impacto directo als patrons alimentários modernos. Baix esta llogica, no havria d’extanyar-mos que malnutricion i obesidat sigan dos dels grans probllemas de las sociedaz actuals, junto a un deterioro medioambiental qu’apunta de plleno a las practicas de l’agricultura industrial.

Per ixo, hem de preguntar-mos qué estam minjant i quí está decidint cómo, quí i el qué se produz. El sociologo estadounidense Anthony Giddens, parlla de la “fiabilidat” entendida como bella “fé” a un sistema de llogros tecnicos u profesionals qu’organizan la vida moderna. Al caso de l’alimentacion, hem aladiau es “sabers populars” que guiavan cómo mos alimentavam pa confiar en “sistemas expertos” que mos estan dint de contino qué minjar. Una informacion cambiant, contradictória i qu’enmascara, en moltos casos, grans intereses economicos. La relacion entre l’indivíduo i el minjar ha deixau d’estar mediada per la cultura de cada puesto i, ara, la suya eleccion (i conseqüencias) pasa a ser responsabilidat de cada uno.

Manimenos, el minjar debe entender-se tamé como un proceso social que materializa una série de simbologias i realidaz própias de cada puesto. Minjar ben, minjar sano, no havria de pender del marketing de las grans corporacions que posan a la nuestra tablla productos ultraprocesaus. Tapoc no é una reivindicacion de la dieta tradicional sin qüestionar-se qué efectos tien. Per contra, debem aprender a minjar, a minjar sosteniblle, preguntant-mos qué alimentos triam, cómo s’han elaborau, si minjam pels uellos, baix qué condicions i qué conseqüéncias tiene la nuestra eleccion.

Pero no é només una qüestion d’eleccion individual sino que debem exigir regulacion i promocion d’un altro tipo d’alimentacion, produccion i consumo. Se debe abogar per una sobirania alimentária que guaráncie el dreto de totas las personas a definir las suyas própias politicas agropecuárias i alimintícias, a proteger i regllamentar la produccion agricola i el mercau domestico i a encaminar-se a un desenrollo sosteniblle tanto ecologico como nutritivo. I esto impllica, sin duda, repllanteyar-mos dende Europa ta ón estam despllazant las conseqüéncias negativas dels nuestros estilos de vida i asumir las responsabilidaz con ixes territórios qu’estan sufrint es efectos de la nuestra politica i practica alimentária.

A la finitiva, manca informacion, desmontar mitos sobre el minjar, aprender a minjar ben. I, el més important, repllanteyar-se qué mena de modelo de produccion agricola querim pals nuestros territórios. Construir una sociedat sosteniblle pasa necesariament per este proceso de concienciacion sobre la importáncia de l’alimentacion pa las nuestras sociedaz.

17 junio, 2018

Autor/Autora


Flickr
Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR