No sabemos quan deixemos que nos fesen creyer que existen luengas millors que no atras. No sabemos quan, pero a sociedat ye chopada d'iste sentimiento. Luengas que no'n son. Febles dialectos. Luengas oficials ta odiar atras. Vencedors. Cultura imposada. Tierra cremada.
As luengas son de totz y de dengun, de vez. As leis son de qui las fan, simplament. No somos guaire de confitar en politicos, tampoco no en leis. Femos servir l'aragones como ferramienta de comunicacion, y luita, de tantas luitas como cullen en una luenga. Qualsiquier atra persona puede fer servir ista ferramienta ta escribrir polius versos, fer cantas, criar uellas u entender o mundo. Ye ista ferramienta d'a humanidat a que imos a esfender.
Hemos parau ta huei un programa especial ta tractar a derogacion de l'actual Lei de Luengas y a enrestida contra l'aragones y o catalan en Aragon. Contaremos con bells convidaus que nos aduyaran a fer un analis amplo y dende esferents anvistas: Mario Sasot, filologo, periodista y director de Temps de Franja; Marco Antonio Joven, Licenciau en Humanidatz y profesor d'aragones en O Trango; Chorche Romance, periodista, historiador y fundador d'o diario dichital Arredol.
Como siempre, tos asperamos de 18 a 19 horas en Radio Topo 101.8 FM u a travies d'a emision online en http://radiotopo.noblezabaturra.org
Fendo Orella | Radio Topo
