Se viene aceptant qu'existen, si fa un no fa, unas 6000-7000 llenguas al mundo. Manimenos tamben s'acepta que més de la mitat d'iste tresoro cultural humano s'havrá perdiu en uns cien anyos

Ye més, gosa dir-se que una llengua desapareix cada dos semanas. M'ocurre que privar a l'aragonés d'iste triste destino, amés de l'amor que siento en general per las llenguas i el inconteniblle placer que siento de comunicar-me con tot ser vivo a la suya llengua, ye el principal motivo d'escribir istas llineas, i ista motivacion no naixe de no res, mai tanto!, naixe de la própia necesidat de describir i de fer arribar la llengua a la mayor cantidat de personas. Como llingüista istas son dos de las patas d'una tablla, que en tiene quatre. Descripcion, documentacion, indexacion i revitalizacion.

Al nuestro caso, como ye normal a la nuestra idiosincrásia hem decidiu de saltar-mos pasos i fer trangos. Fem més vueltas que una rabosa i ista llengua nuestra no'n saldrá pos a dos per tres ye malauda. Pero... ye malauda la llengua u ye malaudo el mundo mira de revitalizar-la?

Punto primero, la llengua no ye guaire ben, ixo cal reconoixer-lo. La suya vitalidat presenta probllemas comuns con quantas llenguas minoritárias a l'arreu de la pllaneta. El que verdaderament me preocupa istes zaguers tiempos ye el mundo que alredola l'aragonés. Més miram de sacar-mos la borreta del meligo que de propiciar una revencillada a la nuestra situacion que mos permita revilcar. I sobre isto de revilcar, encara que ya s'han pasau més de 24 anyos de la mia arribada a l'estarnau mundo de l'aragonés, encara en tiengo fé.

A fé que quan quiero escribir sobre una cosa tiengo el costumbre de mirar-me els diccionários antes de fer-la servir, u simpllement pensar-hie! I no ye que seiga una persona pensarosa, soi més de barruntos, pero no m'agrada refllexionar sobre algo sin tenir la certeza de que las ideas i significaus relacionaus con la palabra que foi servir no son correctas. Soi d'una lexicografia semantica politicament correcta que diria otri. Istes dias l'ha tocau a “fé”, aixinas que, como yeva devant de l'ordinador me va mirar el diccionário d'Alcover, pos amés de mica pensaroso, soi tamben baldragas, pezolaga i malfainer. La primer entrada ye:

  1. Creença ferma en la veritat d'alguna cosa, o en la fidelitat, veracitat o capacitat d'algú.

Fer servir “estarnau” pal mundo de l'aragonés, no ye una novedat, manimenos la fé presenta a iste caso una cllara relacion pos, tenim fé, una fé ciega al que fa i desfa la nuestra tribu sin sisquiera pllanteyar-mos si els que fan els de demés ye correcto u positivo, u seiga que gosam ser més gregários que l'Opus Dei, i aladiam per la nuestra creéncia i fidelidat al cllan, las posiblles verdaz i capacidaz dels atros grupos u personas. Per un regular, istas actuacions provocan que la burra gose sallir-mos capada i que redobllem fayenas, en bel caso per desconoiximiento de la fayena d'otri, en bel caso per la manca de critério própio u simpllement la inexistent preparacion, i bella vez perque mos pensam que l'aragonés ye nuestro i no de dengun més. Sí, yo tamben porto anyos esperant correus de personas que m'esperava que yevam diferents a como a la fin s'amostran, pero ixo ben seguro que no merma la mia fé, i de vez, me fa treballar més i con més ganas.

Ye ista fé la que cal deixar treballar, pero cal pensar que la nuestra fé no deve tenir acronimos ni estar piada per mals usos pel simplle feit d'estar del nuestro cllan, la fé devem tenir-la a la llengua aragonesa, i tenim que mirar-mos més enllá del nuestro cercllo pa depurar las nuestras malaudias congenitas. No mos curarem si fem servir els mismos remédios que provocan el mal. Cal obrir la mente, pos hem siu mui de matar la burra pa desveçar el pollino, i millor iria si amés de en cuenta de sentir escuchasem i si fesem honra a la nuestra llengua copiant la suya forma de ser: Chiquerrina i sin pretensions. Cada qual a l'ofício suyo i el lladron a furtar. Ya arribarem a las obras, pos d'ixa fé, ben en deven de venir.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies