'Punto seguiu' ye una obra literaria fruito d'un anyo de treballo, innovadera en o mundo d'a lengua aragonesa, enreligando fotografías y relatos basaus en istas. Y inspirau en as vivencias d'os dos autors, d'una man Martín Galbe qui realiza as fotos y Dabi Anquela, l'autor d'os relatos que acompanyan a las mesmas.
Totz dos fotografías y relatos, enzarran sentimientos, historias, personaches ficticios y atros no pas tanto, con finals muitas vegadas inasperadas. Dende a triga personal cudiada y mimada dica o detalle más fano.
A tematica ye a saber qué variada, textos muit personals, atros en tercera persona, cabalgan a meyo camín dentre a ficción y realidat. Historias y personaches que nos transportan ent'o suyo interior. O libro remata con una reflexión en primer persona d'o propio autor, fruito d'a suya trachectoria vital.
O libro ye editau por l'Asociación Cultural Nogará-Religada, y o disenyo grafico ye feito por Base Digital (entidat de REAS y Mercado Social Aragón), presentando un formato muit comodo, especial y distinguiu.
Iste chueves 1 d'aviento, a las 19.30 horas, en o Espacio Treziclo en carrera Liñán, será presentau d'a man d'a Biblioteca Frida Kahlo. "En rematar l'acto disfrutaremos d'un vin aragonés, con que podremos chuntar-nos, conoixer-nos y fer una charradeta entre todas", senyala Nogará.
Dabi Anquela ha estau colaborador en a revista O Espiello de l'Asociación Cultural Nogará-Religada, mayestro de lengua aragonesa en a mesma y ganador d'o segundo premio de relatos de "La Bolsa de Bielsa" con s suyo relato 'Fausto' en 2015.
Martín Galbe ye un amant d'a fotografía, no en valde leva meya vida adedicando muito tiempo a iste hobbie-deleria. Experimentau en paisaches urbanos, no deixa d'un costau a naturaleza, en especial as suyas preferidas, as auroras polars y paisaches escandinavos. S'ha desembolicau en conciertos y esportes, un astralicamano.
